投資靠直覺？

好聽啲叫直覺，唔好聽叫靠估。

二月中時，據報香港電視（1137）以市價四倍約廿萬美元購入口罩機。機未送，口罩當然未開始生產。網上只流傳一段疑似口罩機運作片段，市場反應立即似食左過期春藥，港視股價飆升33%。花生友注意力多集中於王維基先生吐氣揚眉，除市值爬過TVB，更向政府刮咗一巴。之後港視公布供股計劃，大家馬後炮一下，驚訝咁嘅絕橋都諗到。

我呢啲廢中當然唔識王生，亦唔評論佢背後機心。我只有興趣思考佢呢個決定究竟係基於直覺，定係千算萬算分折。我覺得對自己一向投資習慣會有啟發。小弟工作生涯中曾向不少企業提供顧問服務，分析，向所謂膠層腦細指手劃腳。據我對一般公司文化嘅認知，以四倍，三倍，甚至市價高幾成嘅採購建議，非一般高層有膽向老闆提出。何況以今天疫情，政治環境不明朗因素，一個建基於數據嘅分析，好難支持到呢種決定。所以我覺得呢一步應該係基於王生個人嘅直覺。

前文提過篩選物業嘅流程，剩下有機會出手嘅盤，我會花時間收集資料，多次現場睇環境，之後excel jockey數據分析當然少不了。無論可行性評估（如借貸，現金流，彍建），不同投資方案嘅投入，風險及回報（如裝修，彍建，重建，民宿，共享屋等），都會一一研究立案及結論。經過多年來重覆研盤，partner 對報告左卒右卒，已有一套拳去執行，不過功夫始終都要付出。

但係分析有啦，數據支持嘅建議擺係眼前，就可唔可以自動波做到決定呢？講真我未見過。

啱啱睇完《鏗鏘說：羅家聰︰末日來臨前》，有啟發，連曾經喺交通銀行做首席分析師嘅羅家聰都話，「trader只需要動物性思維，要有一類直覺，越是分析和思考。。。便會失去時機。」羅先生都自認冇呢種直覺，所以唔炒股票。

真正另到一個人喺物業拍賣會舉手，合約上簽名，我相信係基於分析之後，加上直覺同決心。

我喺以往成功賺錢嘅投資，喺決定嗰一刻通常都有一個必勝嘅感覺。呢個感覺來得強烈，直情係唔買就笨，契弟買得摩個隻。相反，十五十六心情之下做嘅決定，好壞參半。撇除一般婆媽嘅無謂擔心，通常係有一啲不安感覺話比我知我之前嘅分析可能有盲點或不足。好partner 通常會喺呢一刻發揮作用，提出相反意見。所以除非直覺上有必勝決心，否則關鍵在於係千鈞一髮之間，停一停，諗一諗，聽吓人地講。

Look, Look, Shoot

我唔想作出決定之後先向自己解釋，安慰自己。通常決定過後，無論買或不買，心安理得，繼續安樂茶飯，飲番幾杯。

一個當過兵嘅前老闆曾放錢落我袋，做人做事，要look, look, shoot。即一再睇清目標先開槍。但日常中，好多人都係開槍後，先再睇吓有冇射錯。即shoot, look, look, or look, shoot, look。

Look, Look係一再分析，Shoot係直覺。

大家投資上係邊一隻呢？

如果你喜歡呢嗰網誌，請你幫手subscribe，亦可add我Facebook，下面有連結。謝謝！