淺談融入

研究融入，博大精深，小弟不才，只能淺談。先講講融入唔等於嘅；例如硬要同本地文化接軌、認同新國家身份等。

咁點先算融入呢？

先由簡單開始，衣食住行都知埞，日常購物識貨知價，熟習上落班返放學路線，有了第一份工作第一張信用卡等。生活基本需要的已打通左任督二脈，攪掂自己一家站穩陣腳。

你現在吃喝本土的，呼吸著同樣嘅自由空氣，算係同氣連枝，嵌入咗食物鍊的一部份，融入初部完成。

你開始有時間留意一下周圍的人和事，甚至第一次同本地人有磨擦，工作或生活上預到阻滯、受到挫折、甚至沮喪傷心。到呢個階段，無論你喜歡還是討厭呢度，你已經有左感情上的連繫和交流。

你之後交上了第一個朋友，通常背境差不多，啱「 channel」嘅人、亦可能有一個經常囉囉嗦嗦找你麻煩嘅鄰居。你知道要解決問題就要用本土嘅辦法，你有了一啲澳洲思維。

喺咁㗎啦：接受事實mode

你留意到你的呼吸腳步放慢了， 儘管你仍然好嬲點解叫人整水喉成個星期先到。你發覺你就算同隔嚟枱個肥鬼佬格格不入，但大家同坐一架澳洲社會列車，齊上齊落(或者雖然非你自願)。

跟著，一件震撼你嘅事情發生左。你有隻小狗死左、你被無故炒魷、或你香港有緊急家事需要你立即回港，生熟朋友齊齊幫你頂住澳洲日常的。你發覺你原來從不孤單。

你欠了一些人情，你覺得要為本地的多做一點。你可能仍然未睇通呢度嘅中心價值，甚至不同意，但係你明白乜嘢會令本地人開心，同傷心。

咁你係自己人啦。

好對唔住，老移民如我已經不能代入你今天嘅困難與處境，仲可能略帶批判性同你講融入。其實我地好開心你地加入，無論你來自何地。我地只係唔想少左你。因為我地知道你若然不能融入，你將會離開。

融入包括傷心、辛苦去解決問題，勞心勞力。所以本著退休心態，當住酒店，懷著過客心態留在澳洲係可以理解嘅。

放假旅行之中令我想起一件往事，九一一剛發生之後，當時住喺夏威夷嘅前度打電話向我哭訴，國難當前，不明為何街上的遊客還在開心派對中。無他嘅，因為係過客，嗰頭嚟，呢度走。

後記：旅行夏威夷一段完成了（見主題圖片及短片），現在繼續向加州前進，我視為第二家園嘅地方，當地朋友一直好支持我，當我係屋企人一樣。