不經不覺，著作《移民澳洲，墨爾本物業自住投資》出版已經有一年半時間。最近同編輯大人傾計，提起因爲疫情而沒有舉辦嘅書展。同讀者始終緣慳一面，未能親身解答問題。現在幻想書展裏拍晒烏蠅呆坐一角，自問自答一番。
問：你係唔係鼓勵人移民？
答：正正相反。佔了內容差不多一半，如果有讀者睇完覺得不需要、或不適合移民，免得離鄉別井，我覺得係好事。即使不少人對香港現狀及未來感到不安，但其實佢地之中唔少人：
- 低估左佢對香港嘅愛，真係好燃鍾意到不可能離開。
- 低估左佢喺香港舒適圈內嘅種種高度依賴。
- 低估左適應新地方嘅困難。大多只集中心神研究移民門路門檻，其實好戲在後頭，落機之後戰鬥才開始，鑊鑊新鮮鑊鑊金。
問：移民竅門係乜？
答：勇往直前，遇神殺神。完。
冇呢個堅持，有錢去辦投資移民、變相買護照一樣會失敗。相反就算偷渡都會成功。不少香港嘅成功人士正正係偷渡走難來港。
問：點解揀墨爾本？
答：公式答案，工作機會同Sydney一樣多，人工只差少少，但樓價大折讓。
主觀答案，私人感情深厚，風土到人情都係不二之選。
問：宜家買墨爾本樓好嗎？
答：全球都會進入困難時期，如果要兩害取其輕，加上澳元低水，揸墨爾本樓好過香港樓。至於投資，始終要以充足嘅現金流為大前提，次則是堅持無寶不落，打個比喻，如果成個馬季只買一場，你會點揀？
問：點解會寫物業篩選方程方程式之一，二及三？（書中內容）
答：原意係阻止新移民買入本地人唔吼嘅垃圾。
問：點解你地啲老移民經常提住要融入？
答：澳洲人不介意同你分享國家，你始終要照顧佢地感受。你只當澳洲係豪華避難酒店，請自求多福。香港社會最近嘅轉變的確糟糕，但係澳洲人口的組成，由一開始，不少就係因逃避苦難而來。大家都係有故事的人，難分誰更不幸。受過苦並唔係放棄融入嘅必然特權。反而加入社會令你以後嘅旅程不再孤軍作戰。
講得白但又唔怕你嬲，今晚食左誠實豆沙包！
The Emboldening Blog 