澳洲大選結束，以下是我的個人解讀。新總理是Anthony Albanese，讀/ˌælbəˈniːzi/ AL-bə-NEEZ-ee ，四個音節，直至大選前幾日，電視台報導員仍然會讀三音節版AL-bə-neez ，我英文發音九流，照跟照錯。
大家唔多熟悉佢也，不過可能係我孤陋寡聞。Albanese草根階層出身，公屋長大，工黨政治成分正確。但係連澳洲已經對外國解封佢都唔知。
自由黨以競選為首任，保守不作為，自食其果。這半年來可以話係無人駕駛，喺世界急速變化（壞）之時，不負責任，其破壞力較口舌上狂開中國拖更甚。除自由黨外，不少政客都聚焦中國政府干預澳洲，線上線下廣告當眼位全部係抹黑對手同中共有親，不過選民反應是無乜興趣。
極右冇市場，雖然說盡不滿政府人士的糖衣承諾，例如反疫苗接種，加上富豪撐腰狂落廣告，仍然得票減少，更差不多全軍覆沒。我一向覺得澳洲人務實，果然繼續如是。
另外傳統紅與藍都大跌票，究竟老江湖政客知唔知我地要啲乜？只掛住箍實基本擁躉票源，對於大家真正關心嘅，尤其年輕人，沒有落墨。
為年輕人選擇驕傲鼓掌
明顯教育成功，造就獨立思想，年輕人緊張自己未來，固以對抗氣候轉變為優先議題。紅藍兩黨老態畢露，有如香港葉劉，認為自己高高在上、年輕人要倚賴佢哋代為「起機」，只當下一代為扯線木偶，要求佢哋聽教聽話。
這已經開闢成為兩黨政治以外的新路線。乜中共話？甚麼西方乜鬼亞太大聯盟話？攪掂自己先啦！所以年輕人多嘅區，尤其優皮中產區，本區獨立候選人就完勝空降嘅所謂傳統政黨明日之星，仲大玩眾籌支持這批「沒關係議員」競選。
呢班沒關係議員雖然關心本區，但又未必係典型街頭鬥士；佢哋左而不膠，既精英掛帥，但又要照顧弱勢未來，喺撕裂嘅社會中繼續尋找新平衡點。平衡並不代表中間落墨，左右逢源。而是走一條新嘅明路，一條著重環保，澳洲人自己嘅路。
中國關係，地產經濟
不少人覺得工黨上場，會只顧派錢，經濟玩完。睇往績既未必係咁，亦太高估佢哋能力。澳洲經濟可能喺工黨在任其間走下坡，但又未必關佢事。澳洲國力始終太細了人太少，喺世界亂局洪流之中，只能跟著大圍走。你以為佢會同中共和解？還看大佬美國話事。
樓，以至經濟，繼續自求多福，其實已經無人駕駛多年。繼續lucky country。好處是無阻住地球轉，不需太擔心政策市，放眼於價值原則上做決定，繼續無寶就不落。
主題圖片來源：The Guardian 網站。
The Emboldening Blog 