建議以下做法及行程給墨爾本的家長們。
首先呢篇文章唔係聲討某某集團嘗試消滅廣東話及文化，亦絕無此意。本人七十後，細個時殖民地小學開始已經只教文言文。如果唔係Ben Sir（歐陽偉豪），我一直以為白話係唔可以寫出嚟（例如原來搣、撈、撚係正字嚟㗎）。正所謂自己文化自己撐，唔好閂門先至去幫襯。
話說澳洲政府資助電台，考慮合併廣東話及普通話組，引起香港移民關注，有人呼籲大家上去留言比啲壓力。其實坐冷氣辦公室嘅老闆，只看聽眾人數分配資源同重組人手，邊會理你咁多。大家投訴還只會為佢地添麻煩。
我自己本人就咁做法，每週花三小時用來支持廣東文化，輕輕鬆鬆又完成任務。而且花費少，效果又不錯。
每逢星期六，送兩名仔女去上廣東話中文班，九至十二點。父母不需要留下，三歲都收，不同年紀一齊上堂，超happy一齊玩，大人就當變相托兒服務。
之後兩公婆自由了可以去茶記或廣東菜餐館幫襯。老移民一定知道邊間個廚做廣東菜，新嚟嘅睇餐牌，或者去燒味餐廳，就冇死錯人。
等餐時用手機聽或睇本地電台廣東話節目，記得like 吓，好似要like吓我啲劣文一樣（曲）。點擊次數就係最好嘅支持，讓管理人員無話可說。嚟得澳洲，多少相信呢度政府，信佢地會持平。
只係三粒鐘，盡了香港人基本傳承責任。
不要寄望中文班效果同香港學校一樣，小朋友又嬉戲多過學習，大講英文。不過上了兩年小朋友的確可以同老婆用廣東話溝通，收貨也。佢哋用Google translate 抄功課，我亦冇所謂，始終佢地唔太情願去接受呢個苦差。
廣東話班供應不多，但大家可以照去留名，我老婆直頭喺朋友間湊夠十幾人一齊去報名。廣東話班話事人又樂見夠人起機，開多一班又多一個老師搵份兼職外快，又可爭取更多政府資源。
重點係，一年先收$80，係一年呀！仲有托兒，想點。
教會同政府都有舉辦（有link）：
政府VSL，如果你嗰區冇開班可嘗試自己”組團”，需要十五至二十人左右，再直接聯絡經理（墨爾本東區係羅嘉勵小姐）。
SBS廣東話網上廣播。
大家留意外國廣東話廣播多由義工幫手，佢哋雖然未必係專業但請多多支持！我阿媽都報過新聞，仲要自己睇報紙之後寫稿。
主題圖片來源：SBS電台網站。
我的網誌網址及其他文章的連結。歡迎分享連結，並請like and follow 我網誌的Facebook Page ，多謝支持。
The Emboldening Blog 