金錢堆砌快樂

某世界快樂指數排名最新公報，我住過嘅三個地方，澳洲排11，美國19，香港75（中國82）。其背後計算方式無謂深究，不過的確能令人聯想到一個地方嘅美好同黑暗面。排名相對低嘅地方，人們都較愛拚財富，無論係富國定係窮國。（但所謂快樂嘅地方人民亦未必係心如止水清茶淡飯，可能只係天然地理環境物資豐盛。）

瘋狂去搵錢，於是再瘋狂去花。

這個假期再訪拉斯維加斯，可堪稱金錢堆砌快樂中嘅極致。訂枱食飯坐窗口位，加$40、代買一打玫瑰花放枱面，加$90、打賞酒店前台服務員去升級房間$20、坐轎車飲住香鑌遊車河，$300。真。明碼實價。一個地方大環境讓人們把這些東西視為必須品，有先算識玩，happy，勁，威，型。

即使你拒絕被冼腦，美國某些社會制度亦會迫使你不停工作，搾取你每一分製造力。例如自住房嘅30年供樓貸款，每年以樓價計1.1%以上嘅物業税，上車之後，只要你再無工作力無儲蓄，隨時一鋪清袋。這是成為世界第一嘅代價，中國要追？先賠上快樂。

主題圖片：同行朋友於轎車上用手機拍攝，盡顯本文精神。我帶左五部相機，但暫時仍無一佳作。

後記之一：失敗但要再試嘅斷捨離。19年之旅買了並閲畢《斷捨離》一書（已轉贈傳閲，相關前文），購物已經收斂，要再加油。今次再旅行一個月，發覺行李中會用上嘅其實很少，無謂地帶無謂物品環遊世界。完成加州站之時我已經好嬲自己，先掉部分。生活真的應該很簡單，返屋企後又要開始簡化棄物工程。

後記之二：飛機上看了Netflix （偽）記錄片《Minimalism》，及荷李活電影《Nomadland》，影響本文想法，不劇透，建議大家一看。