生活學習環境，潔淨水源，以至美食，係好多人嚮往澳洲嘅原因。呢啲係事實，我都鍾意，但係最感恩得到嘅，始終係可以為我嘅國家投票。
由在票站外邊排隊開始，我就知道已經為澳洲帶來咗一個正面嘅影響。好似人群喺銅鑼灣睇姜B電車經過一樣，真正集氣嘅力量。
我哋支持嘅唔係候選人，而係一個由憲法保護，大家誓死支持嘅制度。勝選人只係代為管理呢個制度，敗選人會大方認輸，不服氣嘅下次再選過。無論邊個贏，贏嘅係我哋嘅制度，亦係我哋安居樂業嘅基礎。
自從小學選班長之後都未試過咁興奮。講真近年主流候選人我都唔喜歡，但我深信我嘅出現、我的投入絕對會造成一點分別。
大家記得出嚟投票，仲要帶埋小朋友去睇去參與。
投票小貼士：揀有BBQ的票站，食住等！
主題圖片來源：ABC
The Emboldening Blog 