歲晚孤兒仔

「傳說世間每個人　也會有一位天使護蔭」

陳奕迅《孤兒仔》歌詞，作詞：李峻一。

一個人住在外國，面對四面牆，過時過節時倍感孤單。

有一年在美國正值感恩節，所有人都會回家團聚。喺個客嘅辦公室中大部份人也提早離開(接近香港人做冬)，三點左右只剩下小貓三四，包括我。剛到貴境的我，二十出頭，小小職員仔，無親無故。客戶大老闆剛巧走過，知我無着落，於是邀請我去她家作客。

受寵若驚，加上年少無知不懂處理，我竟然打電話返公司問我老細我應唔應該去。

「當然啦，你想去就去!」

我臉皮十尺厚，加上點都好過一個人係屋企，於是我決定赴約。

喺個客屋企寬敞嘅飯廳中，八尺長飯枱坐滿三代同堂，再加上我一個陌生人。我被安排坐喺我個客旁邊，即係主人家隔離。她兒孫們你眼望我眼，不知說什麼，我個客人生經驗豐富，逐一介紹她親自下廚煮嘅意大利菜來打開話題，講完餸菜再介紹她家中的藝術品。不過佢又真係煮得好好食，除了是一座數據中心的話事人，佢另有一間意大利餐廳兼藝廊生意。可是她與家人當晚原本一聚天倫的時間被我打擾了，只是善良的她們不介意。

在美國多年非常幸福，以上的經驗不只一次，總有貴人邀請我搭單一齊過節。感恩節隻大火雞雖然又乾又鞋，但咬開永遠是滿瀉的人情味。

再次感激Lauren，更特別鳴謝華姐，查理，及烈叔山E一家人，有了你們，每年所有紅日我唔駛一個人喺房叮TV Dinner食。

今晚我一家四口會在家中食團年飯，如果你又係一個人，會揸車又唔嫌棄酒微菜薄，歡迎嚟一齊食飯。我住喺墨爾本東區，請PM我。

希望大家都齊齊整整，團團圓圓。牛年新年快樂，賺多啲，最緊要身體健康。