神啊！請多給我一點時間

他們不是我生命的全部，但我的生命是他們的全部。

唔好誤會，寫呢篇網誌嘅時候，我兩隻狗阿卑（Baileys)同阿堅（Guinness)仲健在，呢篇文章並唔係佢地嘅福壽版，但係佢哋因為年紀大，雖然冇患大病絕症，身體正在急速衰退中。

十幾年前，有一日同老婆行過旺角花墟，見到志願團體擺檔，為幾隻拯救返嚟嘅唐狗尋找新主人。「我ready 㗎啦！」當我雙眼望住老婆嘅時候，佢已經知我問乜。我自己未養過狗，但係我老婆由細到大養過幾隻。兩星期冷靜期過去，我哋去南丫島接阿卑返屋企。阿卑同周潤發一樣都係南丫島原居民，佢同佢兄弟剛剛出世之後，同父母失散，被義工係一個公廁救返去收容所。當義工打開狗籠抱起才幾個星期大嘅阿卑交比我，佢幾個兄弟都全身顫抖，呢個影像一世都記得。阿卑係典型唐狗，金黃色，有啲似拉布拉多。比起佢其他兄弟，佢毛色更加金黃，上身兩邊膊頭各有一行白色毛，我哋覺得似係天使嘅一對翼。當日去南丫島，多次遇見同一位滿臉笑容嘅中年鬼婆，又聊過幾句，佢每日都經過收容中心見到阿卑。最後撞到佢係當日返到香港落船，佢重話，「you’re a lucky puppy.」有時我覺得呢位鬼婆都係天使化身，將另外一位天使送去我屋企暫住，守護我地。

阿卑喺我地屋企住左半年，我地希望為佢搵個伴，幾次去RSPCA睇狗，都冇一隻同阿卑夾得到。直到有一日，老婆放工經過街市買餸，經過菜檔打電話比我，「菜檔老闆娘話比一隻我呀，超得意㗎，我要呀。」「喂你停一停諗一諗喎。」最後我老婆當然只係通知我一聲，一個屈尾拾就見到一隻狗女BB喺我新裝修屋企廚房門口。阿堅都係雜種唐狗，佢毛色黑中帶少少啡色，幼細而蓬鬆，好似一杯慢慢倒出嚟嘅大杯黑啤，幼細泡沬從底部升起。我地決定叫佢做Guinness，阿堅。阿堅係中環街市出世，佢阿媽長住街市菜檔多年，同另外一隻流浪狗生左阿堅，但生完之後，喺街市咬人，所以比魚農處捉咗。阿堅同兄弟姊妹冇狗媽媽照顧，菜檔阿嬸將佢哋送晒俾有心人。話說有一次去灣仔睇獸醫，巧遇阿堅個阿媽，真係一模一樣樣，咁啱比義工喺狗房接出去睇醫生剪毛。果次係阿堅最後一次見佢親生阿媽，義工冇地方冇能力養佢，相信漁農署之後都會做嘢。

我地住嘅地方好多鬼佬，我地放狗時係咁叫Baileys 同Guinness ，喺人都知我地鍾意飲返兩杯。阿卑同阿堅習慣同我哋大被同眠，一張雙人床就瞓咗一家四口。喺老婆生完大仔出院之前一晚，我同佢兩隻講，「媽媽返嚟你哋唔可以再瞓床啦。」佢地真係有性，之後一步都冇再入過我地睡房。

隨住細女出世，人口增加，我地亦不停搬屋。為方便養狗，先搬去新界村屋。好快移民簽證又批出，一家六口移民澳洲。雖然狗狗移民過程比人類仲繁複，我哋從冇一刻諗過放棄佢哋。經過30日檢疫之後，阿卑同阿堅返屋企一家團聚。

今天阿卑十四歲，已失去走路能力，阿堅十三歲，都係勉強用三隻腳走路。我同老婆商量好，全力盡量照顧佢哋，等佢哋舒舒服服行埋呢段路。雖然行動不便，身體不斷衰退，不過情況尚算穩定。望住佢哋每日都失去某種身體機能，係一種折磨。世紀疫症大流行其中一個好處，就係我哋一家人喺屋企花時間同佢地相處，照顧佢哋。

阿卑同阿堅雖然不再活躍，但仍然愛吃，堅持活著。不過直覺話我知，佢哋距離返天國會合其他天使之期不遠。作為一家之主，我將會面對兩個非常困難嘅決定。我估我自己大約已經準備好，當務之急喺為家人作心理準備，因為呢個療程唔可以喺佢地離去先開始。帶佢地睇醫生，做輪椅，其實醫佢地又醫我地一家心寧。我地後園有一個好似一把大遮嘅樹，小朋友好種意喺嗰度玩，我準備嗰到成為阿卑同阿堅安息之處，但希望嗰一刻遲啲先來臨。

P.S，我少睇日劇又冇睇過金城武呢套劇，只係覺得劇名反映我心情。

P.S.S, 小小呼籲，請大家不要買寵物，支持領養。

如果你喜歡呢嗰網誌，請你幫手subscribe，亦可add我Facebook，下面有連結。謝謝！