要活到二百歲嗎？

張堅庭導演說衰老是病，可防可抗，或者說是減慢。我對於其可行性冇興趣。如果一個人能不停活下去，可能會很痛苦。我視我對狗狗尤如子女，他們已離開一年多，我仍然非常傷心。如果要我不停目擊至愛親朋相繼離去，痛苦到毫無感覺，對世情不再關心，一定非常寂寞。就算冇睇《來自星星的你》（或者被該劇影响），這是容易被感受到的。

所以，人生時間是有限的。我現在47歲，時間很寶貴。

若然我今天繼續好似30歲時咁搵錢儲錢，咁就只係累積成癮，而且會用唔晒嘅，反而浪費我嘅時間同健康。我今天對物質仍有慾望，但絕對唔會用時間同健康去交換。相反，我的工作目標是賺取時間和自由，才可以享受家庭，享用物質。

我要學習追求生活質素，親人陪伴時間，而不是追逐退休時手上有什麼物質。只要一家人生活滿足，物質就自然足夠，呢個唔係雞先定係蛋先嘅矛盾。

今天要累積嘅，係經驗、智慧、人情和故事。工作上要包括傳承，將學到嘅、曾經做錯過嘅，赤裸裸咁傳比下一代。我覺得咁樣比留低財富更重要，如果有錢剩，同下一代一齊花，留下回憶更美妙。另外自私啲講，起碼我有份玩有份享受。

朋友Jackson 看了最新鐵金剛007電影，套用他翻譯了的其中一句對白，「男人要活出人生，而不虛渡。」(對白原文是”The proper function of man is to live, not to exist.” ）

我好肯定我活得很充實，感恩。

後記：看谷德昭導演的《爆谷一周》，節目名好Juice，其實谷導旨在傳承，當然，希望可以令香港人笑一下。

後記之二：你死嘅時候想遺產多，定係花牌多呢？哈哈我兩樣都唔想，環保最緊要。

主題圖片：公園鳩影，但又好似配合到本文感覺。