阿甘式單車遊

病又病完，唞又唞夠，要操返fit。同朋友晨運操車上氣唔接下氣，冇面事小，拖慢車友節奏事大。況且，冇強橫嘅身體，點同班牛鬼蛇神、真小人、偽君子鬥長命。

今天世界已經失去理性妥協能力，有啲人叫擇善固執，又可以話係一意孤行。無論如何千祈唔好低估佢哋嘅決心，香港特首換人，只會換上更強硬嘅人。澳洲大選情況接近，無論邊個贏都唔會向中國輕易妥協。

我地要向內地人學習。香港大陸化，普遍香港人只識百忍成金，繼續搵錢至上。但係有幾多個堅懂得國情，識得用大陸心法同拳譜，去應付大陸文化。要活學活用上有政策、下有對策，枱面一盤數、枱底另一盤。不只兩條腿走路，仲要雙腿擘開向相反方向又唔使五馬分屍。最後仲要練成人格可隨意分裂，標童上身、變臉去應付不同勢力。最最最重要，一賺到錢就要學韋小寶神行八變腳底抹油，走資走情人走細路，在中國每人心中也有一處避難通吃島。

但我識條鐵咩，我只希望做人好簡單，人同單車兩個車轆都只係識得向一個方向行。所以都係留喺澳洲好啲。保持健康，希望等到重見舊香港的一天。

天未光就出發，沒有既定目標目的地。慢慢轆，不停踩著轉動大細齒輪，好治癒。踩到攰就停喺樹下休息，肚餓就喺路邊買嘢食。踩到海邊先返轉頭、亂入安裝中一級方程式賽道、路過田野農場，同羊咩咩say hello，再同自己倒影傾偈。人就是不停向前，我要學阿甘Forrest Gump。