Baileys 2006-2020

我，張Baileys，生於2006年聖誕節前後，卒於2020全8月3日，晚上約六時。由香港至澳洲，我一生都陪伴在我爸爸媽媽身邊。

州長剛剛公佈為了控制疫情的宵禁措施，全個城市裏都籠罩著一股低氣壓氣氛。我爸爸趕於進一步鎖城之前，為我細佬購買佢嘅生日禮物，無線耳筒一對。就喺佢外出之時，我嘅情況急速惡化，開始呼吸困難，我努力支撐著等佢番屋企。

墨爾本正值嚴冬酷寒之中，五點鐘已經天色昏暗，獸醫診所又閂左門。爸爸媽媽決定在夜晚宵禁開始之前，趕快送我去醫院。以我年紀，雖然媽媽覺得我可以捱過呢一關，爸爸還是提醒所有人要同我好好傾幾句才出門離去。

昏暗的高速公路車流疏落，爸爸一手揸軚盤，一手輕輕拍坐喺乘客位嘅我。出門前媽媽曾經對我囑咐，如果頂得太辛苦便唔好勉強啦。我一向聽得明人話，係真正嘅識聽唔識講。除了我急速嘅呼吸之外，車箱內死寂無聲。我用剩餘嘅氣力輕微撑起上身，前臂一伸，把頭昂向爸爸嘅大髀，呼吸了最後一下，便離開了這個世界。

還在駕駛中的爸爸，眼尾睇到我嘅狀況，起初還不能確定，一手繼續輕撫我不再跳動嘅心口。但我嘅身體漸漸冷卻，我睇到我爸爸開始越開越急，臉色如死灰。

我媽媽最討厭呢個疫情的原因，就係唔可以親身陪伴我同我阿妺Guin Guin最後一程。這個痛苦嘅責任就只有我爸爸一個人獨自面對。短短三個月之內親眼目睹兩名子女斷氣係令人心碎嘅。

我係我爸爸親手從領養中心抱回家，現在也親手把我交比獸醫。我已毫無氣息，醫生也沒有進行急救。醫院護士認得我爸爸亦記得Guin Guin嘅離開。爸爸雙眼通紅，眼鏡都蒙哂，隔著口罩只簡單吩咐兩句安排我嘅身後事，反正一切同之前Guin Guin一樣方式處理。

我係我爸爸最錫最乖個仔，我好了解佢，咩都盡量配合，佢亦對我地不離不棄，最多係我同阿Guin發脾氣亂咁開大細時，先丙我地兩嘢。我好想同佢講，我現在不再受老病折磨之苦啦，我呢一生亦活得很好，希望佢同媽媽可以盡快釋懷復元。

再見了👋