多年前經過報攤睇見到壹仔封面，標題大約係《李家誠赤柱嘆徐子淇》，非常juicy 。正值血氣方剛之年嘅我，羨慕不已。徐子淇之後亦順利嫁入李家做其千億新抱。
徐子淇來自中產家庭，八掛雜誌話徐媽當佢鑽石般打磨，將佢送往英國完成埋碩士課程。雖然我不覺得徐媽係有心鋪排個女入豪門，但係講到培養佢就真係每步棋都下得精準，做到「美貌與智慧並重」。
接近道理可套用於現實中替房產增值。傳統豪宅坐落罕有地段，名師設計，貴氣來得自然。但係一般中上樓盤，點樣將佢裝身，希望得到富貴買家寵幸呢？
最近谷友些牙，Hawthorn East 排屋，夾中間，佔地約三百平米，微型前後園，叫五球成功賣出，估計成交價都要四球半。嘩，苛刻啲講觀音頭，咕喱身咁都過到骨。雖然樓市熾熱，但原來真係有其市場。
大家一齊解剖一下究竟有乜裝身伎倆，可以另到物業賣貴過人地，但又有冇肉食呢？
一）升降機，成本約50k
硬件約25k，畫積連permit約10k (假切冇其他建築工程分擔）建築費約15k。
用咁細塊地，起三層難免，可能重有地庫泊車。夜晚攞杯水唔通行樓梯咩。升降機要夠濶，起碼入到輪椅，最平個啲＂子彈lift”就米啦。
值搏率：三層樓無得㨂，一定要做，not an option。
二）游水池，成本約80k
挖地約40k，畫積連permit約10k，建築費約30k。
如果你到今天重唔明，游泳池係用離睇嘅，游唔游水唔係重點。徐子淇個碩士一樣少用得到，最緊要係啲書香，幫四叔開枝散葉。
利申（伸）：我從來冇留意徐子淇啲書香。
值搏率：一定要做，not an option。
三）酒窖，成本約20k
專用冷氣4k ，一級師傅做酒㗎10k，玻璃連裝6k
Lifestyle 玩具，價值在於得閒同朋友入去觀摩下，吹下。只為陳酒其實Dan Murphy 幾時都買到舊酒。最緊要see through 玻璃。參考Doncaster BMW有地下酒窖，從陳列室地面經玻璃望到，香車配美酒，一齊打高一班波。
值搏率：5/5。（5為最高）
四）家庭影院，成本約40k
最麻煩係隔音，新樓度身訂造較易避開縱橫交錯嘅喉管傳聲。否則隔音物料要小心處理。唔好慳，請AV顧問幫手，AV店有介紹。器材普通料可以，留比買家自己升級。不建議加入Gold class 皇帝sofa ，普通sofa即可，賣樓之後搬走自用。但必做智能升降銀幕，比啲土豪嘩吓。
值搏率：3/5。
五）芝士及雪茄房，如果連酒窖一齊做，已出之物。
我唔食雪茄，但每次經過樟宜機場3號客運大樓，見到人地免稅店真係整得好靚。
值搏率：5/5。
六）金屬雕塑，成本10k
賣樓staging 會包油畫，但係雕塑就冇啦。經常換可以只租不買，你地係商場酒店寫字樓見到嘅通常都係租，每年換。呢樣嘢可大可少，如果擔心藝術品味唔夠，可帶同物業設計圖及相片去藝廊找意見。
值搏率：2/5。你啱嘅買家未必啱，如果先自用又愛好藝術又唔同講法。
七）花園設計工程，成本80k
除非無後園，無得慳。你可能鍾意鋪石屎上面放港式燒烤爐燒雞翼BB蕉。裝身扮豪宅啊，你估係大台膠劇BBQ結局。搵個designer 做好佢，種一棵兩棵奇花異樹，同custom design 屋企互相呼應。咁先呃到人。
值搏率：一定要做，not an option。
八）Open Fireplace，已出之物。
原本間屋有就有。新樓記得加。又係lifestyle 玩具，同環保取暖問題無關，最緊要係有燒柴時候霹靂啪lark嘅聲響。唔明睇詹瑞文係志明春嬌個段戲。
九）智能乜乜物物，約20k
開燈閂燈落廉等，唔督燈制，改為掃手機或大叫。個人覺得係除褲屙屁，不過有啲人覺得係gimmicky 。
值搏率：2 / 5。
十）室外Wood fired oven 加BBQ爐全餐，40k
為左agent 廣告上一句＂entertainment haven”，花啦。
值搏率：3 / 5。
十一）Subzero 雪櫃 24k
劉嘉玲都用，上報紙有得同記者吹吓。當九流apartment 都用Miele 嘅時候，可以幫自己升呢。等如Hermès 對”L勞V”。大陸富豪同土豪嘅分別。
值搏率：3 / 5。
各位又有乜idea呢？歡迎留言賜教。如果你喜歡呢嗰網誌，請你幫手subscribe，亦可add我Facebook，下面有連結。謝謝！
The Emboldening Blog 