幾年前如果mortgage broker識你揸住件香港新樓，一定雙眼發光，因為好易按。應該係話按完再按再按x N。
即係所謂提款機。
炒家買左樓，多會先當件貨係提款機，即係喺升市中繼續持貨，但加按將佢變番生錢再炒。如果你堅持係咁炒幾轉，可以一變二，二變四。。。。。順風順水就係。
近排報導有居屋樓神就係咁＂loop loop loop＂炒到輸身家，就係因為不斷買不斷按。
根據蘋果日報10/4報導（見圖），呢位樓神由平凡筲箕灣居屋開始，再買入車位，豪宅。佢喺01年買入筲箕灣愛蝶灣上車，呢個物業應該係佢炒樓嘅＂種子＂。買入最平，升值比例最高，最好按。
如果將事情抽絲剝繭，樓神為佢呢個上車物業做嘅唯一增值工作，就係投入時間。時間加上大圍經濟發展，美國QE等因素，小小種子變大樹。呢個亦係大部分長期持有物業人士嘅經驗。但當我地業主自滿嘅時候，往往只歸咎成功在於自己嘅勇氣同埋眼光。
當你企圖複製自己成功嘅投資，要喺短時間內炒樓致富，時間就再唔係你嘅槓桿。一個地方能夠不斷進步，因為當地人民不斷奮鬥為佢哋嘅地方增值，為佢哋自己增值，為客人提供價值。呢啲價值累積起嚟，物業自然升值，因為住戶搵到兩餐。
如果大家只係翹埋雙手等升值，QE印幾多銀紙都冇用。
銀行不斷加強壓力測試，其實係測試緊你為你嘅投資增值左幾多。大佬，我借錢比你買隻牛，你都要出力去揸奶，最好再將奶水做芝士，做響埋個牌子，令到用同一隻牛比其他養牛人賺更多錢。
銀行最怕啲乜都唔做等坐上經濟順風車嘅人。你可能話，剛性需求啊，點都要住㗎啦。有剛性需求因為有人努力工作增值。如果一個人宅喺屋企，等老媽子煮三餸一湯，佢又點會搬出去，點有剛性需求。經濟一下行，呢啲乜嘢剛性需求即刻唔見哂，食春藥都剛唔起來。我啲租客就係咁走哂。
如果你用市價買樓收市值租金，你都只係隨波逐流。銀行收緊壓力測試，樓又升左，租又加唔到，回報越來越低，好快你就加按唔到。即係銀行兜口兜面笑你，冇鬼用，乜價值都冇。我上年走埋最後一間香港物業，買家收租回報少過2%。我都唔知佢買嚟做乜。我嘅民宿同shared apartment 都能夠收到多過傳統市值租金唔少，但係同銀行借錢都不斷遇到困難。睇貸款部阿姐面色都睇唔少，「先生，你借爆咗，你嘅新增收入都係service唔到個貸款喎。」前幾年銀行生意好，好多時重會加啲輕視嘅表情。
就係咁，坊間多咗好多財仔，甚至做假。上年澳洲政府搵欽差大臣查晒四大銀行，正正就係洗太平地。我個人不喜歡勉強，個市越爛，我越保守。原本我都諗住轉過嚟澳洲重新狠狠地再借鑊金買過，點知：銀行借貸繼續又難又苛刻，都算。每次拍賣都遇著呢啲樓神曬我冷。我冇本事同佢癲。因為以佢地嘅成交價都冇哂肉食。
結果拍賣拍到今年年初一決定暫時收手，睇定啲。
唔知算係我好彩，定係因為緊守左拍賣前計好嘅上限出價，喺呢個時期我繼續去左槓桿，保持現金。宜家唯有還原基本，想辦法增值。以前有位老闆日日都問，「你今日嘅工作，有冇為客人增值？」
The Emboldening Blog 