Moonee Pond

我生活所以我寫blog。

疫情爆發之前，每一兩個月都會同多年朋友出去玩番晚，飲吓酒。Happy hour，打完邊爐，去埋賭場再飲啤酒先盡興。一晚飲到失憶之前，同枱一班年輕人搭訕聊天。其中一位一睇就知佢係東南亞華僑移民第三代，非常sharp，叻仔一名。喺四大銀行做，負責研究物業及為其估價。

酒醒之後其它閒聊話題已經忘記得一乾二淨，只記得有關物業投資，雖然佢得幾年年資，喺佢研究過嘅案例之中，覺得西區近CBD嘅舊屋，有六七百平米嘅地皮以上非常有前境。

人類永遠對呢啲萍水相逢所得嘅生埃貼士最上心。移民三十年，落腳東區三十年。對西區認識不多，及多少保留一般Melbourne 人對該區嘅偏見。西區有著濃厚藍領，草根，式微左嘅製造業，新移民，罪案，殘留土地嘅污染物等等嘅影子。我讀中學時三分之一嘅學生係亞洲人，但只有包括我兩位香港人。其他人多數係住喺西區嘅越南，緬甸同柬埔寨人。所以聽埋聽埋，知道啲皮毛。除左去Footscray 食碗pho 之外，好少親腳去行吓西區。今朝雖然只有八度，但難得停雨，決定去Moonee Pond踩番轉。

之前目測同睇媒體報導，知道西區已經變化不少。不少新移民已經落地生根，有學識有財富，近CBD一帶重搬入左好多優皮一族，中產味濃。要重新了解西區，要清楚其社會轉型狀況。

首先要攪清楚，西區居民雖然相對上平均比東區居民收入少，但從來唔喺貧民窟，更唔係悲情社區，有入冇出。二三十年前其低廉地價，唔單止冇局限佢哋嘅發展，重幫勤力嘅居民慳到錢，儲到向上流嘅資本。我喺Footscray 牛肉粉店門外，見過越南人揸法拉利買外賣。而家越南人下一代重點會開雜貨鋪，佢哋好多已經係大公司裏面身居要職。

記得廿年前明星足球隊嚟Melbourne 踢波，好多越南人去睇港星。當時陳百样重客串講波，佢第一句就大聲嗌咪，「等我同各位打個招呼先，北茂豆奶。」如果你重好似呢條爛坦咁一般見識，你唔會明白西區嘅社會改造，更冇可能投資。

今朝踩去Moonee Pond，集中時間睇近火車站，Puckle St，Gladstone St，Mt Alexander Road 之間。之前問定西區原居民嘅越南華僑朋友，知道雖然個區好細，隔一條街可以一念天堂，一念地獄。Moonee Pond 距離CBD只係7.5 公里，不少明星footy 球員都落腳呢度，係西區好唔錯嘅住宅區。

首先經過The Junction，除電車及火車外，更係巴士大站，駁腳去附近各區，交通滙聚，冇得輸！Puckle St 同The Junction 一帶更＂有街行＂，有齊基本生活娛樂所需。周圍行見到該區多年居民凝聚力好強，好多對近年過度發展反感，屋外都掛起反對標語。相對Richmond，Brunswick ，感覺Moonee Pond密度較低，獨立屋之間較多空間，較少見到屋貼屋。屋型設計都多元化，Victorian，Bungalows ，Contemporaries 都有。今日見到不少居民出外買餸，㗎啡，外賣，目測大都有禮，斯文，可能我去左好啲個角落。

價值扺唔扺方面，大家可以從成交價拗到面紅耳熱。我今天嘗試用街坊智慧度一度。城市間比較有麥記巨無霸指標，Melbourne區與區之間可看Bánh Mi（越南法包）價格。今日凍到飛起，踩左幾十K，都要祭一祭個五臟廟，買番條新鮮出爐法包做嘅越式三文治食。