寫blog真好，有乜錯漏，自動有熱心網民糾正。表面上我提供左內容，其實係我免費學到嘢至真。
有口話人，冇口話自己，其實自己都對西區有既定諗法。我住東區咁多年，其實除咗食好嘢，睇樓，好少去西區。打個比喻，我係一架香港島的士，好少過海。喺Melbourne我不自覺地以Spencer Street 為界，被一道無形圍牆局限自己，同自己講跨過圍牆就係西部。所以今次迫自己，去看清楚真實嘅一面，決定去Sunshine行吓。咁啱架前七整車有手尾跟，要返去Sunshine 車房，冇違反政府限制。
有兩件事，影響我對Sunshine嘅觀感睇法。讀中學時有一朝早，同同學玩嘅時候一掌拍落佢心口。佢竟然痛到嗌救命，我自知自己掌法冇咁勁，原來拍中佢新嘅紋身。呢位來自Sunshine嘅越南陳浩南，雖然聰明絕頂讀名校，始終嚮往江湖生涯，放學後晏晝有時都會喺火車站打下交。喺考VCE之前幾個月，冇再見到佢返學啦。
最近民宿大閘鐵鏈padlock 壞左，要剪開。咁啱經常幫手嘅tradies 喺到，即管問佢有冇一把大鉸剪。「梗係有啦，喺車尾箱，你知啦我哋住西區㗎嘛。」另加蠱惑眼神一個。
都係自己親腳行一趟，眼見先為實。成日話睇樓，其實係睇個區。樓冇乜好睇架，只係一堆轉頭。我好鍾意幻想自己住喺嗰度，照舊日常生活半日，做運動，去圖書館，行公園，放學時間望吓人接放學，試過去埋人地區個泳池游水。了解嗰區居民日常生活路線，既可以知道最方便嘅黃金地段，又可以睇吓當地居民質素。
另外，Sunshine有個玄武岩礦場，被發展商收購發展，有興趣去八吓。呢個礦場其實係一個大坑，中間有條小河流過。風水好唔好唔識講，但係感覺起到密密麻麻，另外景觀只可以話係開揚，唔可以同一般山景物業比較。
以前Sunshine 係一個草根區，原有建築物都好humble。隨着居民生活改善，見到好多屋都拆卸重建成為大屋，設計實用樸素，顯現出踏實嘅一面。揸車經過，見到一條街之中，可以一面全部都係新屋，另外一面仲係舊屋。地積方面都係family size ，frontage 好闊。
泊車去council 附近市中心停車場，因為lock down人流不多，但係見到同Footscray 一樣，有好多非洲人加入左呢個社區，加上原本嘅越南人，兩分天下。相對Footscray，地方及其建築物都比較新，光鮮，乾淨。2015-16年西北區一帶係全省GDP增長之冠，Council油水應該唔少。算佢公道，新市政大廈連圖書館起得好靚，火車站同市中心都翻新左。相信我舊同學以前打交嘅地方而家都唔同晒啦。
攞住買餸袋周圍行，遇到嘅人都有禮貌，冇見到inner suburbs常見嘅遊蕩閒雜人。相信喺一個好family 嘅社區。大部份食肆同雜貨鋪都係越南人或者非洲回教徒開嘅，好少白人同中國人。蔬菜新鮮，買香葉，例如金不換，芫荽蔥，dill 等，一攞上手有香味，而且價格較東區Springvale 同Box Hill平。
又嚟Bánh Mi 指數時間，盛恵五個半。今次買埋越南腸粉做外賣，皮薄餡料足，魚露鮮甜，貨真價實，一啲都唔差過Springvale。
不過一啲草根市民嘅痕跡亦都見到。喺東區已經幾乎絕跡嘅當舖Cash Converter，大大間喺呢度，裏面仲人來人往。橫跨火車軌嘅新行人天橋，裝咗起碼四米高鐵絲網，如果中大同理大參考照做，我估一啲都唔出奇。
總括感覺良好，覺得呢度社區轉型非常成功，居民明顯同經濟增長同步，生活不錯。
我會唔會喺度住? 講真唔會，不過並唔係佢有問題，又可以用返香港島居民做比喻，始終習慣咗有感情，情願住喺北角街市側邊，都唔會搬去新界港鐵上蓋新樓。
新移民呢，why not!
投資，睇價錢啦，Sunshine已經升左好多。見到居民都係努力工作嘅家庭客，同落地生根嘅分支家庭客，始終血肉長城，大跌機會不大。
會繼續留意西區，搵日再去睇過，順便再買包腸粉，因為冚家9秒九掃晒。
The Emboldening Blog 