就算你對Warrandyte區物業冇興趣，Warrandyte係Melbourne 居民嘅後花園，唞氣空間。Warrandyte只距離CBD 32km，城市邊緣，背靠state park 及Yarra River，Melbourne 人可一瞬間暫別繁囂，多見樹木少見人。
最起碼要知道關於Warrandyte 嘅幾件事或活動：
- 市中心近河邊cafe 食brunch一流。介紹Next Door 嘅 早餐Yogurt Panna Cotta，另外晚市wine list 好impressive。Grand Hotel 飲啤酒（好好坐，食嘢一般）。The Bakery 嘅meat pie，坐落遊樂設施旁邊，小朋友可放電，大人啡一啡。Stonehouse Cafe 每日新鮮做嘅scones。
- 沿Yarra River 河邊餵鴨(切記用指定飼料），放狗，夏天喺陀地著名swimming hole游水（小心注意安全）。
- 每個月第一個星期六舉行嘅Warrandyte Market。必吃有瑞士smoke salmon crepes ，必買有手做gnocchi 同有機蔬菜。
- 曾經係尋金熱點，有古蹟行山小徑。
- 曾經有人非法捕捉yabbies，雖然應該比人食哂，但都請各位高抬貴手。
好天記得一家大細嚟行吓山，嘆個靚早餐，買埋餸，之後去睇樓，非常好嘅星期六安排。琴日天氣好，又想操下山，踩車過去八吓。Warrandyte 區好多山路，最斜一比七，唔踩唔知身體好。
關於睇樓，你有冇喺一啲區，只係鍾情某一條街呢？唔係話其他街同屋唔好，但只係鐵了心非君不嫁。喺Warrandyte 我只喜歡Oakland Drive。呢條街清一色acre property，只適合自住。雖然大屋大地打理多，同區又有細積物業，但係一場搬到入嚟Warrandyte，就不如接受下呢種接近鄉郊生活。
我只用接近嚟形容，因為Oakland Drive又未到住喺樹林裏面，五分鐘車程到超市，步行幾步出大路即有經freeway出CBD巴士，又有獨立單車徑接駁去幾百米以外嘅中學。街境同一般優質住宅街道無異，同鄰居無相差太遠，嗌救命應該有人聽到。
其它區散步放狗最多行下公園，喺Warrandyte喺行山，背靠郊野公園，袋鼠跳來跳去。十五分鐘車程去Yarra Valley酒莊食飯，最高質哥爾夫球場，直接同農場買菜買肉。如果有時間煮，我喺春天會買半隻春羊，烤，焗，炆，煎。
Oakland Drive 大部分屋約三四十年樓齡，我較喜歡大number 尾段高位近大路（但又未到）。尾段啲屋外觀保養較好，較多業主完成番新。另外單數屋門口向西，後園向東。因地方又大又濶，容易有利靈活設計，令到大部份日常生活空間向北。因為尾段係高位，採光度更高。利申我冇貨，多年前曾經睇過61號，隔兩塊地到大路，夠靜但方便。61號一層半，樓上只有主人套房連retreat同大露台，樓梯下係酒窖，樓下以L字型圍繞游泳池興建，大部分生活空間向北，喺acre 物業中，見過較聰明同實用嘅設計。
如果你喜歡呢嗰網誌，請你幫手subscribe，亦可add我Facebook，下面有連結。謝謝！
The Emboldening Blog 