後沙士睇樓記

冠狀病毒爆發，分享一個後沙士嘅睇樓經驗。

2004年，小弟剛結束我嘅美國人生階段，決定回香港生活。當時樓市氣氛很差，大部份人都冇意欲買樓，覺得重會跌。

當時新盤包括貝沙灣，嘉亨灣等。

剛回港有時間，決定去睇吓樓，見有地產代理提供免費接駁巴士從金鐘去貝沙灣，當然要八一八。嗰時香港人垂頭喪氣，儘管係豪宅，冇人會睇你唔起，膽粗粗去運吉。(後話，以前貝沙灣點算喺豪宅，屋村隔離，西斜，對住南丫島三支香。。。。)

到達金鐘站，平日，幾大㗎代理巴士泊喺到等運到。經紀同司機只小貓三四隻，都百無聊賴。我喺年輕半竹升仔，打扮求其，經紀望都唔望。

「係唔係接送去睇貝沙灣？」

經紀對我上下打量，眼角有啲啲不屑。可能還掂要交夠睇樓人頭，同發展商交待，我成功包車入貝沙灣。司機應該有紅van揸飛機經驗，經紀同我吹唔夠幾句已經到域多利道。經紀：「重有十八個月樓花。」貝沙灣地盤出現眼前，一期同二期石屎森林喺瀑布灣前升起，隱約見到燒焊工人嘅火花。

示範單位展覽會場喺地盤搭建，落足本，似影婚沙相地方多啲。

嘩！不枉此行，前台啲接待員間直喺港姐冠亞季級數。經紀不如你彈開啦。除了喺馬會包廂之外，我未見個咁筍嘅接待員。我係美國太耐啦。

靚女熟手地show價單，經紀：「中低層賣哂啦，剩低四千三一呎以上。張可頤啱啱入左兩間四千蚊一呎咋。」

「呢道雙層玻璃趟門，幾皮野咖，隔熱，唔怕西斜。」經紀帶我呢個鄉下仔出城行左一圈。

「我喺美國賣左樓，而家留意緊香港樓市。」求其hea住先，搵藉口坐番車走。

回程車手冇楂咁快，時間過得好慢。經紀同我相對無言。「先生你睇落好後生噃！」潛台詞即係後生仔睇你都冇錢買樓。運吉嘅我只尷尬地笑一笑。巴士路經薄扶林道。「會唔會睇埋寶翠園？」經紀發揮香港人打不死精神，窮追猛打。「鑽石廳唔啱啦。」之後直到金鐘都係dead air。

PS: 病毒爆發未必喺買樓機會，但係當人人無興趣，經紀多個睇樓客，銀行懇求你借錢嘅時候，就喺人生黃金機會。

研究呢個體驗，要代入當時環境同心理

首先，樓花要即供上會。發展商未識巧立名目比回贈，你要硬掘攞三成現金出嚟，差不多一球。成街負資產，幾多人會有呢。經濟差，發展商電盈又似老千，樓花你敢唔敢？

數碼港係新區，好聽D叫薄扶林，唔好聽叫華富邨隔離。有錢佬真係會去？

大家只知道係放狗好地方。

風水好，會爆升，係後話。重有，當時太古城兩房只二百六十萬。你有一球會穩穩陣陣，定係買貝沙灣樓花搏一搏？

PPS: 小弟喺血氣方剛之年有幸痴上痴喺賽馬日上左去馬會會員包廂，大開眼界，我記得係喇沙舊生會包廂。我當然唔喺呢啲藍血人，啲靚女當然又睇得出我係鄕下仔。感觸階層之分，但係一股熱血湧上。。。腦袋，提醒自己第日好準時番工。

如果你喜歡呢嗰網誌，請你幫手subscribe，亦可add我Facebook，下面有連結。謝謝！