乜都唔睇，放狗去也

係上一年，我覺得最利好維省經濟同樓市嘅消息就係各個超大基建上馬，人同金都齊備，全部開波。但始終醜婦要見家翁，執行上都出左問題。元旦已經上報紙開始出事。我覺得會好大影響，加上山火，疫症。自從年初一之後已經停去拍賣。

因為我覺得無論決定如何，都冇乜實際原因支持，含赌博成分。所以決定即使賺少啲，都hold 住先。我又唔like 成日買買賣賣。同係賭場賭錢一樣，參與賭局越多，你輸嘅機會越高。

老豆教落，個人投資單打獨鬥，就算你係葉問上身，可以一個打10個，只要投資交易頻率高，總會遲早輸心理。

有錢人有専業團隊代處理，每年見幾次卒吓數就可以。曾替Melbourne 某著名老牌家族提供上門顧問服務。呢個家族連i-banker都唔駛幫襯，佢哋有自己私人抄房，portfolio 乜都有。辦公室坐落自家物業，黃金地段。有私人入口，唔駛同租客些牙。

以下係佢地股票投資主要＂陣容＂（另外有地產及其它投資，另有團隊負責）

CEO，負責大刁。同大企業啲所謂膠層不同，係我見過氣牆數一數二勁。

CFO ，揸數，報數。即負責簽名嘅會計師。

四名會計。

一名內部核數師。

八名揸鑊鏟交易員。

兩個admin 姐姐。

另外有五六位我唔知佢做乜嘅，共廿幾人。

佢哋都有訂閱Bloomberg 資訊，及買financial modelling ，每日有download，唔駛睇什麼財演廿八日月經平均線，問米陽燭等。

我當然連行近佢地個位嘅資格都冇，佢哋都好小心乜都唔會俾你睇到。佢竟然放得出離嘅料，經三四手去到你手上，信佢一成，雙目失明。

重點係，投資上我點同佢成隊人鬥？！

所以我同自己講，通常兩個情況下先出手：

一）以現價，計過回報ok ，即係有錢佬啲餸頭餸尾機會。

二）見到成街有錢佬輸到眼凸嘅時候

尤其係（二）。

最近世界好亂，每日大上大落。資訊海嘯，我個腦冇雲端運算能力，索性不處理不吸收。

係呢個panic 嘅時候，我要努力維持平靜的心。

乜都唔睇，放狗去也。

P.S: (12/3) 只留意澳元下行，算係情況（二），尤其係穿五嘅時候。我重有九注要入，越跌越買。

P.S.S: (8/5) 更新，五蚊樓下入左幾注，由上年至現在平均買入成本五蚊。我隻可憐老狗已經唔行得啦。大家珍惜眼前人。

P.S.S.S: 以下真實對話

@lok ，「呢個project 要投入$xxx，business case 做好左，請review。」

@CEO，「不用。無需business case。呢個project 係不能避免嘅支出。」

幾型！不過同佢開會一啲都唔enjoy。佢唔係啲逃避作決定嘅膠層，不過問題尖銳，每花一蚊都要值，你要做足準備。唔清楚就答＂不知道＂，再做功課。湊過呢個老闆之後，我對自己嘅投資決定以同樣力度，苛刻地仔細研究。