點解寫Blog?

多謝各位支持。網絡世界提供一個空間比我發噏風，另外有機會可以寫吓＂白話＂廣東話。

Chat Group ，social network 呢個玩意對於我呢啲癈中喺新玩意。舊年有一日訓醒，決定要認識一下。我希望有三：

一）了解比我後生嘅朋友嘅諗法，尤其係投資諗法，網路使用。

二）尋找投資想法接近新朋友，合作機會。sell 吓，market 一吓自己，即係賣藥。

三）被教訓，糾正盲點，學新野。

來得最快當然係教訓，原來公海聊天谷普遍不可賣藥。當然非常合理，乖乖守規矩。

其實當其他谷友讀者未認識你，賣藥都冇人聽。我對我嘅動機直認不諱，如果我話我係聖人提供免費午餐，大家可能反而當我係儍仔。

因為同一時間生意仔推廣所需，考慮過買like，買KOL寫鱔稿等。最後都喺決定慢慢用最organic 嘅方法去積聚讀者群。即係定期為大家提供有質素內容。我喜歡攝影，追蹤一個非常成功blogger Eric Kim。呢個咁迂迴曲折辛苦之路，就係佢教嘅。多得大家有質素嘅留言，總算不愁冇靈感。亦學識處理不同意見回覆，盡量不溫不火，虛心交流。

寫下寫下，發現過程讓自己再想清楚題目，從新思考。「如果再來一次，我做法重會唔會一樣？」

另外，寫作可keep myself honest，唔好比自己講一套做另外一套。

最後，呢啲累積左嘅文章喺我留比我小朋友嘅。其實唔係咩金科玉律，我反而想佢地走自己嘅路。不過我相信人總有好奇追溯前人嘅心路歷程，所以以此為記錄。

我之前寫下不少中英文嘅內容，包括投資，創業，寫意生活，人生觀等，並開左呢個網站。我會慢慢將我嘅劣作post 喺呢到，方便大家搵返啲舊文。歡迎大家喺呢嗰blog到留言，亦可上我Facebook一齊再傾。所有新post將會喺我Facebook同網站同步上載。如果大家有私人問題想問，可以經Facebook Messenger搵我，請唔好用whatsapp。下面有連結去我Facebook，歡迎add我，或者subscribe呢個blog，咁每次有新post你地都會知道。